بەرێوە چوونی ڕێوڕەسمی ٢ی ڕێبەندان، ٧٤هەمین ساڵڕۆژی دامەزرانی کۆماری کوردستان لە وڵاتی فینلاند

ئێوارەی ڕۆژی شەممە ڕێکەوتی ۲٥ی ژانویەی ٢٠٢٠، بە بەشداری پڕ شکۆی ئەندامان و لایەنگرانی حیزبی دێموکراتی کوردستان، کوردستانیانی نیشتەجێ لە وڵاتی فینلاند، نوێنەرایەتی حیزب و ڕێکخراوە کوردستانیەکان، کۆمەڵە ڕێکخراوە مەدەنیەکان و به هاوکاری یەکیەتی ژنان و لاوانی ڕۆژهەڵاتی کوردستان، لە وڵاتی فینلاند ڕێوڕەسمی ساڵیادی ۷٤ ساڵەی دامەزراندنی کۆماری کوردستان، بەڕێوە چوو.

سەرەتای ڕێوڕەسمکە، سرودی نەتەوایەتی ئەی رەقیب لە لایان کۆری سرودی یەکیەتی لاوانی دێموکراتی رۆژهەڵاتی کوردستان خوێندرایەوە و دەقیقەیەک بێ دەنگی بۆ شەهیدانی گەل ونیشتمان بە تایبەتی سەرقافڵەی شەهیدان ودامەزرێنەری کۆماری کوردستان پێشەوا قازی محەممەد راگەیەندرا

لە درێژەی ڕێوڕەسمەکە دا، مۆمی ۷٤ ساڵەی دامه‌زرانی کۆماری کوردستان، لەلایەن کاک فەقێ حەسەن ئیبراهیمی و کاک ئاوات حەسەن پوور بە نوێنەرایەتی بنەماڵەی شەهیدان داگیریسا.

لە بەشێکی تری ڕێوڕەسمەکە بەیاننامەی دەفتەری سیاسی حیزبی دێموکراتی کوردستان کە بەم بۆنە پیرۆزەوە ئامادە کرابوو لەلایەن کاک قادر قادری بەرپرسی کومیتەی حیزبی دێموکراتی کوردستان ــــ کۆمیتەی فینلاند، خوێندرایەوە.

له بڕگەیەکی تری ڕێوڕەسمەکەدا، پەیامی پارتی دێموکراتی کوردستان “پاڕتی” لە لایەن کاک بەختیار ئیسماعیل و بەرپرسی لێژنەی ناوچەی پارتی لە فینلاندەوە، پەیامی بزووتنەوی گۆران مەکۆی فینلاند لەلایەن کاک سیروان سابیر، پەیامی کۆمەڵەی دۆستایەتی کورد وفینلاند لەلایەن خاتو شیرین زەکی، پەیامی پارتی ژیانی ئازادی کوردستان پژاک لە لایەن خاتو سنور حوسێنی، کومیتەی پێشمەرگە دێرینەکان هیوا شوانی، فیدراسێونی کۆمەڵە کوردستانیەکان ئەیوب سوری، بروسکەی پیرۆزبایی و پارتی کرێکارانی کوردستان پ ک ک، بروسکەی پیرۆزبایی کۆمەڵەی شۆرشکێری زەحمەتکێشانی کوردستان، بروسکەی پیرۆزبایی بەرێز مامۆستا ئەبووبەکر فەلسەفی تێکۆشەری دێرینی دێموکرات، خوێندرانەوە.

لە بەشی کۆتایی ڕێوڕەسمەکە دا، هونەرمەندان کاک شۆرش بۆکانی و کاک فەرهاد ئالانی که تایبه‌ت بو ئه‌م یاده بانگهیشت کرابوون بە دەنگە ڕەسەنەکەیان، کۆڕی هەڵپەڕکێی ساڵیادی دامەزراندنی ۷٤ ی کۆماری کوردستانیان، گەرمتر کرد و بە پێشکەش کردنی چەند ئاوازێکی ڕەسەنی کوردی لە لایەن هونەرمەندانەوە، کوتایی بە ڕێوڕەسمەکە هات.

ڕێوڕەسمەکە کاتژمێر، ٦ی ئێوارە دەستی پێکرد و کاتژمێر ۱۱ی شەو کۆتایی پێ هات

[NPG id=7266]