بەرێوەچوونی کۆڕێک بەبۆنەی ٢٥ی نوامبر لە شاری ستۆکهۆڵم

ڕۆژی شەممە ڕێکەوتی ٣٠ ـ ١١ ـ ٢٠١٩ یەکیەتیی ژنانی دێموکراتی کوردستان لە سوئێد، کۆڕێکیان بە بۆنەی ڕۆژی ٢٥ی نوامبر ڕۆژی بەرنگاربوونەوە دژ بە تووندوتیژی ژنان بە بەشداری کۆمەڵێک لە ژنان و پیاوانی یەکسانیخواز بەرێوەبرد. سەرەتا لە لایەن خاتوو لەتیفە جەباری ئەندامی بەڕێوەبەری کۆمیتەی یەکیەتیی ژنانی دێموکراتی کوردستان بەخێرهاتنی گشت ئامادەبووان کرا و دواتر خولەکێک بێ‌دەنگی بۆ گیانی هەموو ئەو کەسانەی لە پێناو ئازادی نیشتمان و پرسی یەکسانیخوازی لە کۆمەڵگا دا گیانیان بەخت کردووە ڕاگەیاندرا، پاشان خاتوو لەتیفە مەبەستی سەرەکی بەرنامەی کاری چەند کاتژمێری سمینارەکەی پێشکەش کرد و بە خوێندنەوەی چەند کۆپلە شێعری تایبەت بەو ڕۆژە سمینارەکە دەستی بە کارەکانی خۆی کرد. دوای ئەو بەشە گرووپی موزیکی شەوگار بەڕێزان ئەحمەد ئازەرپیرا، ھونەر ئازەرپیرا و سۆما ئارام بەدەست‌وپەنجە ڕەنگینەکانی خۆیان و بە دەنگی بە سۆزی خاتوو سروە حوسێنی بە گوتنی سرودێک لەژێر ناوی ژن بەشدارانیان بردە نێو دونیای موزیک و لە درێژەی بەرنامەکەش دا چەندجار بە دەنگی بە سۆز و بلاوێنی خاتوو سروە و هەروەها دەست ڕەنگینی موزیک ژەنەکانی شەوگار سمینارەکەیان ڕازاوەتر کرد. بەشی دووهەمی بەرنامەکە بۆ خاتوو سۆزان ئەمینی ئەرمەندی، شارەزا لە بوارە کۆمەڵایەتیەکان تەرخان کرا بوو. لەو بەشەدا خاتوو سۆزان بە دوور و درێژی باسی شێوەی کار کردنی خۆیان و چۆنیەتی ھاوکاری و یارمەتی دان بەو بنەماڵانە و بەتایبەتی ژنان و منداڵان کرد کە دەکەونە بەر ھێرشی توندووتیژی. بەڕێزیان ئاماژەی بەچەندین خاڵ لە یاسای تایبەت بەپاراستنی تاک و بەتایبەتی منداڵ و ژنان لە نێو کۆمەڵگای سوئێدی دا کرد و گوتی ئەرکی سەرشانی ھەموو تاکێکە کە لە ئاست ھێرشە جوراوجۆرەکانی توندووتیژی دا بێدەنگ نەبن و شوێنی پێوەندیداری لێ ئاگادار کەینەوە. لە بەشی کۆتایی دا خاتوو سۆزان گووتی: بۆ چارەسەری بن بڕ کردنی توندووتیژی و بۆ ئەوە کۆمەڵگەیەکی بەدوور لە توندووتیژیمان ھەبێ پێویستیمان بە یاسا و پەروەردەیەکی سالم ھەیە. بەگشتی بەشداربووان دوای باسەکەی خاتوو سۆزان، بە پرسیار کردن و تێ‌بینی‌یەکانی خۆیان باسەکەیان زیاتر دەوڵەمەند کرد. یەکێکی تر لە بەشداربووان، خاتوو بەھار مفتی بوو کە لە دوو بڕگەی جیاواز دا بە ھاتنە سەر سێن و خۆێندنەوەی چەندین شێعر و ھۆنراوە بەدەنگە بەسۆزەکەی کۆڕەکەی گەرمتر کرد. بەشی کۆتایی ئەم سمینارە تەرخان کرا بوو بۆ ڕێز گرتن لە سێ خاتونی تێکۆشەری نێو ریزەکانی یەکیەتیی ژنانی دێموکراتی کوردستان و پێشمەرگەی نێو سەنگەر و خەبات لە حیزبی دێموکراتی کوردستان دا، کە بریتی بوون لە بەڕیزان خاتوو ماپەرە قەرەگۆلی، خاتوو نازدار کەریمی و خاتوو خەدیجە ڕۆستەمی، بە گشتی لە لایەن خاتوو لەتیفە جەباری وەک پێشکەشکار ڕێزیان لێگیرا و دواتر هەر یەک لەو بەرێزانە بە باسکردن لە ژیان و بە سەرهاتی خۆیان کۆمەڵێک باسی تایبەتیان بە ڕۆژانی سەختی خەبات لە نیو ریزەکانی حدک و یەکیەتیی ژنانی دێموکراتی کوردستان دا کرد و باسیان لە شێوەی هاوکاری و خۆشی و ناخۆشی‌یەکانی ڕۆژانی سەنگەر لە کوردستان و دواتریش لە دەرەوەی وڵات کرد. لە کۆتایی دا خاتوو لەتیفە جەباری سپاس و پێزانینی کۆمیتەی بەڕێوەبەری یەکیەتیی ژنانی دێموکراتی کوردستان لە سوئێدی بە ھەموو ئەو کەسانە راگەیاند کە بەشداری کۆڕەکە بوون و بەو شێوەیە کۆتایی سمینارەکە راگەیندرا.

یەکیەتیی ژنانی دێموکراتی کوردستان کۆمیتەی سوئێد