كۆبوونەوەی هەیئەتێكی كۆمیتەی ح د ک لە ئاڵمان لەگەڵ وەزارەتی دەرەوەی ئەو وڵاتە

ڕۆژی چوارشەممە ٢٣ ی ئۆكتۆبر هەیئەتێکی حیزبی دیموکراتی کوردستان پێکهاتوو لە بەڕێزان خالید حەسەن پوور ئەندامی ڕێبەری حیزب، سوڵتان گوڵاوی بەرپرسی كۆمیتەی ئاڵمان و فەرزانە رەشیدزادە بەرپرسی کومیتەی ئاڵمانی یەكیەتی ژنانی دیموکراتی کوردستان، لەگەڵ بەشی پەیوەندیدار بە كار و باری ئێران لە وەزارەتی دەرەوەی ئاڵمان بۆ ماوەی كاتژمێرێك كۆبوونەوە. ‎لەو دانیشتنەدا هەیئەتی حیزب لە سەر بارودۆخی كورد بەگشتی و ڕۆژئاوای كوردستان و بەدرێژە قسەی كرد.

‎هەیئەتی حیزب وێڕای سپاس لە دەوڵەت و خەڵکی ئالمان كە لەو بار دۆخە هەستیارە دا بەهەر شێوەیەك كە لەدەستیان هاتوو پشتگیری و یارمەتی كوردیان كردووە، سەرنجی وەزارەتی دەرەوەی ئاڵمانی ڕاكێشا بۆ سەر ئەو زەخت و فشارانەی كە لە پەیوەندی لەگەڵ هێرشی ئەرتەشی توركیا بۆ ڕۆژئاوای کوردستان و بەگشتی بۆ هەموو بەشەكانی كوردستان هاتووەتە پێش. هەر لەو پەیوەندیە دا هەیئەتی حیزب بە درێژە باسی بارودۆخی سیاسی و ئابووری ڕۆژهەڵاتی كوردستانی بۆ وەزارەتی دەرەوەی ئاڵمان كرد و لەو پەیوەندیە دا ئاماژەی بە گرتنی زیاتر لە سەد كەس لە چالاكوانانی سیاسی و مەدەنی كە لە پەیوەندی لەگەڵ خۆپێشاندانەكانی دژ بە هێرشی توركیە بۆ سەر ڕۆژئاوای كوردستان، لە لایەن هێزەکانی ڕژیمی ئیسلامییەوە گیراون.

لە پەیوەندی لەگەڵ پاراستنی بەرجامدا هەیئەتی حیزب پێی لەسەر ئەوە داگرت كە ئێمە وەكوو كورد و حیزبی دیموكراتی كوردستان نیگەرانین کە لە پێشێلکارییەکانی مافی مڕۆڤ لە ئێران بكەوێتە ژێر سێبەری ئەو ڕێکەوتنەوە و لەو بارەوە داوای لە وەزارەتی دەرەوەی كرد كە پرسی مافی مڕۆڤ لە ئێران بە گشتی و لە كورستان بە تایبەتی لە بیر نەكەن.

‎لە پەیوەندی لەگەڵ سیاسەتی زیادەخوازانەی كۆماری ئیسلامی لە ناوچەدا هەیئەتی حیزب ئاماژەی بە نفوز و دەستێوەردانەكانی كۆماری ئیسلامی لە ناو چە بە گشتی و ئێراق بەتایبەتی كرد و لەو پەیوەندیە دا تیشكی خستە سەر موشەكبارانی قەڵای دیموكرات وەك یەكێك لە دەرەنجامەكانی سیاسەتی دەستدرێژكارانەی كۆماری ئیسلامی‎. جێگای ئاماژەیە كە بەرپرسی یەكیەتی ژنان ئاماژەی بەوە كرد كە لەو هێرشەدا سكرتێری یەكیەتی ژنان شەهید بووە و چەندین ژنی دیكەی ئەو ڕێكخراوە برینداربوون و لەناو بریندارەكاندا تەنانەت مناڵیشی تێدا بووە.

‎هەیئەتی وەزارەتی دەرەوەی ئاڵمان كە پێكهاتبوو لە بەڕێزان خانمی تۆیمێز و ئاغای زیگفرید وێرای سپاس لە هەیئەتی حیزب و پێ خۆشحاڵ بوونیان بەو دیدارە، ئەوانیش لەگەڵ هەیئەتی حیزب هاوڕا بوون و نیگەرانی خۆیان لەدەست تێوەردانەكانی ئێران لە ناوچە و بەتایبەت دەست تێوەردانەكانی كۆماری ئیسلامی و بەكار هێنانی موشەكی دوورهاوێژ بۆ لێدانی بنكەی ناوەندی حیزب لە باشووری كورستان دەڕبڕی‎ و هاودەردی خۆشیان لەگەڵ ‎هەیئەتی حیزب سەبارەت بە قوربانییەكانی ‎موشەكبارانی قەڵای دیموكرات هێنا گۆڕێ. ‎لە كۆتاییدا هەیئەتی حیزب داوای كرد كە كۆمەڵگای نێودەوڵەتی دەبێ سنورێك بۆ دەستدرێژی و هێرشی توركیا و ئێران بۆ وڵاتانی دەورووبەر و گەلی كورد دابنێن و پێش بە كارەساتی چاوەڕوان نەكراو و شەر و پێكدادان لە ناوچەكە بگرێ. ‎جێگەی ئاماژەیە كە دەوڵەتی ئاڵمان هەم هێرشەكانی توركیا بۆ سەر خۆرئاوی کوردستانی بە توندی مەحکووم کرد و هەم پێشنیاری ڕێگا حەلێكی نێودەوڵەتی بۆ پرسی كورد لە ڕۆژئاوا كردووە.

حیزبی دیموکراتی کوردستان- کومیتەی ئاڵمان