دیداری نێوان بەرپرسی پەیوەندییە نێودەوڵەتییەکانی کومیتەی حدک لە وڵاتی سوید و وەزارەتی دەرەوەی ئەو وڵاتە

ڕۆژی سێشەممە ڕێکەوتی ١٦/٠٧/٢٠١٩ بەڕێز ئارێز ڕەمەزانی بەرپرسی بەشی پەیوەندییەکانی دەرەوەی حیزبی دێموکراتی کوردستان لە وڵاتی سوید چاوپێکەوتنێکی لەگەڵ بەشی چاوەدێری ڕۆژهەڵاتی ناوەڕاست و بەرپرسی کاروباری ئێران ئەنجام دا و لەو دیدارە دا چەند بابەتێکی گرینگ هاتنە بەرباس.

لە تەوەری یەکەمی ئەو چاوپێککەوتنە دا باس لە تۆپباران و بۆردمانی هیزەکانی ڕژیمی ئێران بۆسەر بنکەکانی حیزب لە سەر سنوری کاتی ڕۆژهەڵاتی کوردستان کرا. بەڕێز ڕەمەزانی وتی: هەروەک ئاگادارن چەند ڕۆژ لەمەوبەر لەلایەن هێزەکانی کۆماری ئیسلامیەوە لەڕێگای تۆپخانەو کاتیۆشاو فڕۆکەی بێ فڕۆکەوان هێرش کرایە سەر بنکەکانی حیزبی دێموکرات و کۆمەڵە و لە ماوەی دو ڕۆژ تۆپباران و سنور بەزاندنی کۆماری ئیسلامی بەداخەوە چەند خەڵکێکی سیڤیل بونە قوربانی و بریندار بوون.

بەڕێزیان وتی ئەمە یەکەمین هێرش و دوایین هێرشی کۆماری ئیسلامی بۆ سەر حیزبە ڕۆژهەڵاتیەکان نیە و نابێت، هەر بۆیە بە پێویستم زانی باسی ئەم هێرش و هەڕەشانە بکەم کە کۆماری ئیسلامی لە حیزبە ڕۆژهەڵاتیەکانی دەکات و وەزارەتی دەرەوەی سوئێدی بە باشی ئاگاداری ئەم مەوزوعە کرد.  

دوەمین باسی ئەم دانیشتنە بۆ ساڵیادی شەهید کردنی دوکتۆر قاسملو تەرخان کرابو کە وەبیر هێنانەوەیەک بوو بۆ ئەوان کە بەباشی ئاگاداری ترۆر و مەترسیەکانی ئێرانن بۆ سەر ڕێبەر و چالاکانی حیزب و نەیارانی خۆیان، کە بە درێژایی تەمەنی کۆماری ئیسلامی قەت دەستیان لە هەڕەشە و ترۆر هەڵنەگرتووە و لەو ماوەیە دا سەدان کەس لە چالاکانی سیاسی ڕۆژهەڵاتی کوردستان کە لە پێناو بیروباوەڕی سیاسی خۆیاندا تێدەکۆسان گیان بەخت کردووە.

لە درێژەی ئەم دانیشتنەدا کوشتنی کۆڵبەران و کاسبکاران هاتە بەرباس و هاوکات ئاوڕێکی جیددی لە پێشێل کردنی مافەکانی مرۆڤ درایەوە. پێویست بە ئاماژەیە کە باس لە مافەکانی مرۆڤ لە ئێران و کوردستان زۆر جێی بایەخی وڵاتی سوئێدە و هەمیشە پاڵپشتی لە دابین کردنی مافی مرۆڤ کردوە، بەڵام ئیستا دەبینن کە بە کوشتنی کۆڵبەران و کاسبکارانی کورد هەموو ڕۆژێک ئەم مافانە پێشێل دەکرێن.

خاڵێکی دیکە کە باسی لەسەر کرا، گرتن، ئەشکەنجە و ئیعدامی گەنجانی ڕۆژهەڵات و ئێران بوو کە دەیان هەوێت بە ئازادی بژین و بۆ بەدەست هێنانی مافەکانیان لە نێو خۆی وڵات خەبات دەکەن. هەمو تاکێک مافی خۆیەتی کە بە ئازادی بژی و نابێ هیچ بەربەستێک هەبێت لە بەردەم بە دەست هێنانی مافەکانیان، بەڵام بەداخەوە جگە لە ئازادی، تەنانەت هەموو مافە سەرەتاییەکانیش لە کوردی ڕۆژهەڵات وەرگیراوەتەوە، بۆیە ناچارن بۆ بە دەست هێنانی مافەکانیان بەرەنگاری ئەم کۆمارە ببنەوە، کە بە داخەوە لەو پێناوە دا دەیان هەزار کەس بوونە قوربانی دەستی دیکتاتۆرەکانی ئێران.

جێگای باسە کە لە ماوەی ساڵێکدا، ئەمە سێهەم دانیشتنی بەڕێز ئارێز ڕەمەزانیی بەرپرسی پەیوەندییەکانی دەرەوەی کومیتەی حیزبی دیموکراتی کوردستانە لە سوید لەگەڵ وەزارەتی دەرەوەی ئەو ولاتە.

حیزبی دیموکراتی کوردستان- سوید